خواہش ہے گلگت بلتستان کے عوام کو تمام تر بنیادی حقوق حاصل ہوں،مسٹر یائو جنگ

اسلام آباد (پ ر) پاکستان میں چائنہ کے نئے تعینات سفیر مسٹر یائو جنگ نے وزیراعلیٰ گلگت حافظ حفیظ الرحمان سے ملاقات کی جس میں سی پیک کے منصوبوں پر ہونے والی پیش رفت اور نئے منصوبوں کے حوالے سے تفصیلی گفتگو ہوئی، چائنیز سفیر کا کہنا تھا چین پاکستان کا لفظی نہیں بلکہ حقیقی دوست ہے اور پاکستان بھی ہمیشہ چین کے شانہ بشانہ رہا ہے، چین کی مرکزی حکومت اور شنکیانگ حکومت کی خواہش ہے کہ گلگت بلتستان پاکستان کے دیگر صوبوں کی طرح ترقی کرے اور یہاں کے عوام کو تمام تر بنیادی حقوق حاصل ہوں، اس ضمن میں ہم اقدامات بھی کر رہے ہیں، نئے منصوبوں کے آغاز بارے کام بھی جاری ہے، وزیراعلیٰ گلگت بلتستان نے اس موقع پر سفیر کا خصوصی شکریہ ادا کرتے ہوئے کہاکہ چین حکومت اور عوام کی پاکستان سے محبت بے لوث اور ٹھوس ہے اور یہ محبت اور اعتماد کی فضاء سی پیک سے اور زیادہ بہتر ہوئی، ہماری خواہش ہے کہ گلگت بلستان پاکستان کا خوشحال ترین اور ترقی یافتہ صوبہ بنے۔

اسلام آباد (آئی این پی) پاکستان میںچین کے تعینات سفیر مسٹر یوجنگ نے وفاقی وزیر برائے اُمورکشمیر و گلگت بلتستان چوہدری محمدبرجیس طاہر سے اسلام آباد میں ملاقات کی ۔ملاقات میں دوطرفہ تعلقات اور خطے کی امن وسلامتی اور ترقیاتی منصوبوں کے حوالے سے بات چیت کی گئی۔ پاکستان سے تعاون کی تعریف کرتے ہوئے وفاقی وزیر نے کہاکہ چین پاکستان کا آزمایہ ہوا دوست ملک ہے جس نے تمام موقعو ں پر عملی طورپر ثابت کیا کہ پاک چین دوستی ہمالیہ سے بلند اور سمندروں سے گہری ہے ۔وفاقی وزیر نے اس موقع پر مسئلہ کشمیر پر چین کی حمایت پر اُن کا شکریہ ادا کیا اور کہاکہ آٹھ لاکھ بھارتی افواج مقبوضہ کشمیر میں لوگوں پر بد ترین تشدد کا ارتکا ب کر رہی ہیں اور تشدد کی ان کاروائیوں کی شدت میں آئے روز اضافہ ہو رہا ہے ۔انہوںنے کہاکہ بھارتی افواج مقبوضہ کشمیر کی ڈیمو گرافی تبدیل کرنے کے لیے کشمیری نوجوانو ں کو ماورائے عدالت قتل کررہی ہے اور بچوں کو مہلک پیلٹ گن کے استعمال سے اندھا کیا جارہاہے ۔وفاقی وزیر نے ایل اوسی پر بھارتی افواج کی جانب سے بڑھتی ہوئی جنگ بندی کی مسلسل خلاف ورزیوں پربھی بات چیت کرتے ہوئے کہاکہ بھارت کی جانب سے بلااشتعال جارحیت اور پرُتشدد کاروائیاں خطے کے امن کے لیے انتہائی خطرناک ہیں۔ملاقات میں پاکستان میںچین کے تعاون سے جاری ترقیاتی منصوبوںسے متعلق بھی بات چیت کی گئی۔ اس موقع پر وفاقی وزیر نے کہاکہ چین کا ون روڈ ون بیلٹ منصوبہ ایک عظیم منصوبہ ہے جو اس خطے کی معیشت اور اربوں افراد کی زندگیوں میں مثبت تبدیلیاں لائے گا۔ انہوںنے کہاکہ پاک چین اقتصادی راہداری منصوبہ ایک گیم چینجر منصوبہ ہے جس سے پاکستان اور چین کے باہمی اقتصادی سیاسی اور ثقافتی رشتے اور بھی مضبوط ہوں گے۔ملاقات میں چینی سفیر نے کہاکہ چین کی حکومت اور عوام پاکستان سے اپنے رشتوں کوقدر کی نگاہ سے دیکھتے ہیں اور وہ پاکستان کو ایک مضبوط ، خوشحال اور ترقی یافتہ ملک دیکھنا چاہتے ہیں ۔انہوں نے کہاکہ چین ہر شعبے میں پاکستان سے تعاون جاری رکھے گااور لوگوں کی فلاح وبہبود کے لیے خصوصاً گلگت بلتستان میں چھوٹی سڑکوں اور ہسپتالوں کی تعمیر میں پاکستان سے تعاون کا خواہش مند ہے انہوںنے کہاکہ مسئلہ کشمیر پر چین پاکستان کی حمایت جاری رکھے گا اور چین کا یہ ماننا ہے کہ اس مسئلے کا حل خطے کی امن وسلامتی کے لیے بڑا ہم ہے اور اس مسئلے کا حل بھارت اور پاکستان کے درمیان مذاکرات اور پرُامن طریقے سے ہونا چاہیے۔سی پیک کی اہمیت پر روشنی ڈالتے ہوئے معزز سفیر نے کہاکہ اس منصوبے کی وساطت سے اس پورے خطے کی عوام کی تقدیر بدل جائے گی اور خوشحالی کے ایک نئے دور کا آغاز ہو گا۔ اس سے قبل وفاقی وزیر نے چینی سفیر نے پاکستان میں تعنیاتی پر مبارک باد پیش کی اور اُمید ظاہر کی کہ وہ پاکستان اور چین کے درمیان پہلے سے موجود گہرے رشتوں اور روابط کو مزید مضبوط کرنے کے لیے اپنا فعال کردار ادا کریں گے